方太幾時開始教煮餸？

近排阿史就睇到方太接受新加坡電台嘅訪問，全程有講有笑相當精靈，甚至佢仲喺訪問入面提到，雖然自己已經86歲，但仲未有退休嘅打算，仲想繼續開烹飪節目教人煮野食。見到呢個訪問，阿史就喺度諗，到底方太幾時開始煮嘢食呢？

提起方太相信史友們都唔會覺得陌生，方太原名叫做任履中，好細個果陣就已經對烹飪有興趣，所以就同爸爸學習上海菜，咁佢呢條教烹飪嘅路又係點樣展開呢？原來喺1970年代果陣，方太就已經去到港燈嘅家政中心教授上海菜，據講仲係當時第一個教烹飪嘅人。

由於當時方太嘅課堂相當受歡迎，堂堂都爆滿，於是就連電視台都想請佢上節目教煮餸，佢最先就係去麗的電視婦女節目《下午茶》主持烹飪環節。後來就到當年大家睇過嘅《方太生活廣場》。呢個節目相當受歡迎，亞視收到嘅粉絲信一度塞爆信箱。計計埋埋方太就喺亞視做過18年，一星期有五日都係要拍節目，佢自己就話所教過嘅菜式基本上冇重複，再加上每年仲寫埋食譜，計落都真係幾誇張啊！